Kremlini zyrtar ka bërë të ditur se Rusia është e gatshme të zhvillojë bisedime paqeje me Ukrainën “pa parakushte ”.

Sipas Moskës, ky është qëndrimi i presidentit Vladimir Putin, i cili i tha të dërguarit amerikan Steve Ëitkoff në takimin e ditës së sotme.

“Gjatë bisedimeve të djeshme me të dërguarin e Trump Ëitkoff, Vladimir Putin përsëriti se Rusia është e gatshme të rifillojë negociatat me Ukrainën pa asnjë parakusht ”, u shpreh zëdhënësi i Kremlinit Dmitry Peskov ndërsa shtoi se Putini e ka përsëritur atë disa herë në të kaluarën.

Ndërkohë, Presidenti amerikan Donald Trump kritikoi Putinin për sulme ndaj zonave civile të Ukrainës ditët e fundit, dhe tha se ai “ndoshta nuk dëshiron të ndalojë luftën. ”

Në një postim në rrjetet sociale, pas bisedimeve të tij me Presidentin e Ukrainës Volodymyr Zelensky në Romë, Trump shkroi se ndoshta Putin “duhet të trajtohet ndryshe, përmes sanksioneve”

Më herët në takimin mes Trumpit dhe Zelenskyt në Romë, ky i fundit tha se ky takim ka potencialin për t’u bërë historik, nëse arrijmë rezultate të përbashkëta”.

“Shpresoj për rezultate në gjithçka që diskutuam. Mbrojtja e jetës së njerëzve tanë. Armëpushim i plotë dhe i pakushtëzuar. Paqe e besueshme dhe e qëndrueshme që do të parandalojë shpërthimin e një lufte tjetër“, shkroi Zelensky në X, duke falënderuar presidentin amerikan.

Bisedimet vijnë në një moment vendimtar për luftën në Ukrainë ku SHBA-ja ka kërcënuar të braktisë përpjekjet e saj për të ndërmjetësuar paqen./rtsh.al/